Urdu Poetry In Urdu
| اب شوقِ سفر خواہشِ یکجائی بہت ہے | دشمن ہی ملے راہ میں تنہائی بہت ہے |
| ہم کون سے غالب تھے کہ شہرت ہمیں ملتی | دُنیا تیری اِتنی بھی پذیرائی بہت ہے |
| زخموں کی نمائش کا سلیقہ نہیں ہم کو | اور وہ ہیں ! انہیں شوقِ مسیحائی بہت ہے |
| لوگوں سے تعارف نہ کوئی جان نہ پہچان | دل ہے کہ اسی بزم کا شیدائی بہت ہے |
| گلیوں میں مگر کوئی دریچہ نہیں کُھلتا | آپس میں یہاں شوقِ شناسائی بہت ہے |
| شامیں ہیں بہت ویراں برسات میں محسن | کہنے کو بڑا شہر ہے تنہائی بہت ہے |
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
کمرے میں ہے بکھرا ہوا سامان وغیرہ
کَھٹ، خواب، کتابیں گُل و گُلدان وغیرہ
اِن میں سے کوئی ہجر میں امداد کو آئے
جن، دیو، پری، خضر یا لقمان وغیرہ
تُو آئے تو گٹھڑی میں تجھے باندھ کے دے دوں
دِل، جان، نظر، سوچ، یہ ایمان وغیرہ
بس عشق کے مُرشد سے ذرا خوف زدہ ہوں
جھیلا ہے بہت ویسے تو نقصان وغیرہ
٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭٭
مُجھے کُچھ اور کہنا تھا
وہ سُنتا تو میں کُچھ کہتا، مُجھے کُچھ اور کہنا تھا
وہ پل بھر کو جو رُک جاتا ، مُجھے کُچھ اور کہنا تھا
کمائی زندگی بھر کی، اُسی کے نام تو کر دی
مُجھے کُچھ اور کہنا تھا، مُجھے کُچھ اور کہنا تھا
کہاں اس نے سُنی میری، سُنی بھی اَن سُنی کر دی
اُسے معلوم تھا اِتنا ، مُجھے کُچھ اور کہنا تھا
میرے دل میں جو دَر آیا، کوئی مُجھ میں بھی دَر آیا
وہاں اِک رابطہ ٹوٹا مُجھے کُچھ اور کہنا تھا
رواں تھا پیار نَس نَس میں، بہت قُربت تھی آپس میں
اُسے کُچھ اور سُننا تھا ، مُجھے کُچھ اور کہنا تھا
غلط فہمی نے باتوں کو بڑھا ڈالا یونہی ورنہ
کہا کُچھ تھا، وہ سمجھا کُچھ، مُجھے کُچھ اور کہنا تھا
|
کوئی تبصرے نہیں:
ایک تبصرہ شائع کریں